Utuh Karinyum Si Naga Hirang (Bagian 6)
Anam
Matan Kampung Dadap, Utuh
Karinyum bajalan ka ampah utara manuju kutaraja Nagara Dipa. Jar kisah urang
rami banar mun di kutaraja tu. Urangnya banyak, rumahnya ganal lawan
harat-harat. Banyak karasminnya. Sagala macam urang ada di situ, tamasuk urang
Tiyungkuk nang harat-harat kuntaw nang hudah dikatahuani urang di nagri-nagri
bawah angin wan atas angin.
Wayah
nitu Karajaan Nagara Dipa hanyar diparintah lih Raja Suryanata nang manurut
kisah katurunan Majapahit matan tanah Jawa. Parmisurinya bangaran Putri Junjung
Buih, putri katurunan Karajaan Tanjungpura nang hudah dihancurakan tantara
Majapahit wayah Gajah Mada handak malibarakan dairah Karajaan Majapahit
sanusantaraan. Tuhuk Mangkubumi Lambung Mangkurat mancari’i Putri Junjung Buih
naini handak diangkat jadi raja bibinian atau ratu mamarintah Nagara Dipa nang
masih kada baisi raja tumatan didiri akan lih kuitannya Mangkubumi Lambung
Mangkurat nang bangaran Ampu Jatmika.
Imbah
mandapat patunjuk aruah abahnya, hanyar Mangkubumi Lambung Mangkurat kawa
manamuakan Putri Junjung Buih. Sakalinya putri nitu hudah diasutakan
kaluarganya ka alam karajaan urang halus sakira tantara Majapahit kada kawa
mambunuhnya nang handak mamusnahakan katurunan Karajaan Tanjungpura sakira
kadada lagi nang mambaruntak atawa mambalila lawan Majapahit.
Imbah
Mangkubumi Lambung Mangkurat bajanji pacang maangkat Putri Junjung Buih jadi
raja di Nagara Dipa, hanyar putri nitu hakun di bawa ka alam nyata. Imbah hudah
mamarintah Nagara Dipa, asa kada nyaman jua Mangkubumi Lambung Mangkurat
maliyat ratunya baluman baisi laki. Inya manakuni Putri Junjung Buih, napa
hudah baisi calun laki sawayah di alam gaib tu.
Putri
Junjung Buih mai’ih akan. Jarnya calun lakinya di alam gaib hudah dititisakan
ka dunia liwat raja Majapahit di Tanah Jawa. Di Jawa calun lakinya tu dikiyaw
Radin Putra. Mangkubumi Lambung Mangkurat tulak ai ka tanah Jawa manamuani raja
Majapahit mainta anak raja tu nang bangaran Radin Putra sakira hakun dibawa ka
tanah Tanjungnagara gasan diangkat jadi raja di Karajaan Nagara Dipa.
Raja
Majapahit nang hudah mandapat kisikan matan diwata, bahuwa anaknya nang
bangaran Radin Putra nang diulihnya matan balampah pacangan jadi raja diraja di
tanah subarang nang bangaran Tanjungnagara. Maliyat Mangkubumi Lambung
Mangkurat datang matan tanah nang dimaksut tu, inya kada kabaratan. Radin Putra
dijulungnya.
Imbah
datang di Nagara Dipa, dikawinakan ai Putri Junjung Buih lawan Radin Putra.
Imbah jadi raja, Radin Putra tu bagalar Suryanata. Marasa hudah tuha, umur
hudah parak saratus tahun, Mangkubumi Lambung Mangkurat maundurakan diri jadi
mangkubumi. Inya basadia dikiyaw gasan diminta pandapat amun karajaan mimang
mamarluakan banar.
Lian
inya hudah manyiapakan pangganti dirinya. Ampat ikung pamuda sakti nang takanal
banar di jagat pandikar Tanjungnagara nang digalari urang Ampat Tambunaw
Gunung Madang hakun dilajarinya ilmu maatur nagri atawa ilmu pamarintahan.
Kaampatnya
diangkat jadi patih Nagara Dipa. Dasar urang sakti wan pintar-pintarnya,
sakalinya kaampatnya tu kawa jadi patih nang diandalakan. Rakyat manyambat
buhannya nang baampat tu lawan Patih Ampat. Asa tanang ai Mangkubumi Lambung
Mangkurat di palampahannya. Inya kada lagi umpat mamikirakan urusan karajaan.
Nagara Dipa hudah kawa dilapasnya. Walasan tahun imbah tu, inya lalu mandiwata,
hilang lawan awak kasarnya. Jar urang tu Mangkubumi Lambung Mangkurat hudah
jadi urang halus! Sampai wayah damiya inya masih hidup haja!
Kaampat
patih nang baasal matan jagat pandikar tu bangaran Patih Garuntung
Manau, Patih Garuntung Waluh, Patih Panimba Sagara lawan Patih Pambalah Batung. Amun patihnya
harat-harat, kuat ai jua Nagara Dipa. Imbah Patih Gajah Mada wan Raja Hayam
Wuruk mati, Nagara Dipa wani malapasakan diri, bapadah kada taikat lagi lawan
Majapahit, jadi nagri nang bibas mardika.
Imbah
marasa kuat banar, lalu ai Raja Suryanata mangirim tantara manyarang Karajaan
Kutai, Pasir, Sambas, Sukadana, wan dairah lainnya nang ada di Tanjungnagara.
Tantara Nagara Dipa nang hudah kuat matan jaman Mangkubumi Lambung Mangkurat,
manampayakan kaharatannya. Karajaan-karajaan naitu kawa dialahakan.
Kada
talalu lawas, jadi ai Nagara Dipa jadi karajaan nang ganal wan kuat-kuatnya.
Karajaan lain di Tanjungnagara kaya Sarawak wan Sabah kada wani
macam-macam. Kaya itu jua lawan Karajaan Tiyungkuk nang ditakutani urang di
dairah nusantara wan nagri-nagri atas angin, kada wani maulah parigal lawan
Nagara Dipa. Pukunya wayah diparintah Raja Suryanata wan Putri Junjung Buih,
Nagara Dipa jadi karajaan nang dimalui karajaan lain.
Rakyat
hidupnya nyaman. Makanan, papan wan pakayan mayu gasan rakyat. Kadada nang
kakurangan. Tagal kaya apa gin makmurnya rakyat, sakalinya masih ada nang kada
puas, ada nang mahiri’i. Kada katuju maliyat Raja Suryanata bahasil mamarintah
Nagara Dipa.
Nang
hiri tu kada urang jua, masih basapupu haja lawan Putri Junjung Buih. Urang ni
masih marasa katurunan Karajaan Tanjungpura, jadi inya marasa baisi hak jua
mamarintah jadi raja. Jadi kisahnya ni, inya ni handak manajak Karajaan
Tanjungpura nang hudah lawas hancur tu.
Marga
hudah puluhan tahun basungkup sakira kada disasah-sasah lih tantara Majapahit
lagi, inya kada mamakai galar tutusnya lagi. Jadi sahari-harinya inya dikiyaw
Busu Talimbah haja. Urangnya sakti jua. Di jagat pandikar inya
mandiriakan Panunggalan Naga Kancana atawa Sarikat Naga Amas. Amun
wayahini saku kawa haja disamaakan lawan partai pulitik nang katuju bacingkurah
haja daripada mamparjuangakan nasip rakyat.
Inya
mimang handak mamampaat akan anggutanya gasan mambaruntak wan Nagara Dipa
kaina. Bahubung anggutanya masih saratusan ikung haja, jadi inya kada wani
batatarangan hulu handak mambaruntak. Pas anggutanya parak manduwa ratus, iya
am, mulai ai inya maulah daur Nagara Dipa. Tagal wayah maulah daur tu, buhannya
manyarupa jadi bagal, jadi buhan Nagara Dipa kada manyangka bahuwa bagal nitu
yatu buhan angguta Naga Kancana nang handak mambaruntak.
Rancak
banar angguta Naga Kancana tu manyarang tantara Nagara Dipa nang sadikit
atawa mambunuhi buhan pajabatnya. Takutanan ai urang jadinya. Bahanu jua
mambagal urang-urang sugih gasan puku maulah sanjata atawa malatih anggutanya
sakira harat batampur.
Tagal
kada bungul-bungulnya Patih Ampat ah. Nagara Dipa baisian tantara nang husus
digawiakan hagan maintai, manyuuk, mauntil lawan manyalidiki. Ngarannya tantara
tilik. Mun wayahini disambat urang badan intilijin nang kaya CIA ampunnya
Amirika atawa KGB ampunnya Rusia tu luku. Sinapati Udang, kapalanya tantara
tilik Nagara Dipa bahasil manyalidiki bahuwa Panunggalan Naga Kancana nang
maulah daur di Nagara Dipa.
Patih
Ampat lalu ai mangirim pasukan husus Nagara Dipa nang hudah bapangalaman manyarang
ka karajaan lain nang bangaran Tantara Naga Umbang. Markas Panunggalan Naga
Kancana disarang. Tagal buhan Naga Kancana nang hudah tahu pacangan
disarang, bukahan badahulu mambiarakan markasnya dibanam Tantara Naga Umbang.
Imbahitu,
Busu Talimbah jadi hagaan urang karajaan. Angguta tantara tilik wan
Tantara Naga Umbang disuruh mancari’i angguta Naga Kancana wan katuanya
Busu Talimbah sakira ditangkap hidup atawa mati. Banyak jua pang angguta Naga
Kancana nang tatangkap. Tagal amun kapalanya masih kawa kujuk-kujuk di
luaran, tatap ai anggutanya nang lain kawa maharu-haru Nagara Dipa.
Maliyat
nang kaya itu, Patih Ampat lalu maulah sayambara, siapa nang kawa manangkap
hidup atawa mati Busu Talimbah pacang dibari’i amas gulancang sapati! Mandangar
sayambara nang kaya itu, lalu ai buhan jagat pandikar umpat mahaga Busu
Talimbah sakira kawa mandapatakan hadiah nang sing ganalan naitu.
Tagal
Busu Talimbah kada sambarangan urang. Inya tamasuk urang nang baisian kajian.
Banyak hudah pandikar nang tajungkang di tangannya wayah handak manangkapnya.
Tagal kaya itupang, amun mata urang hudah liput lawan harta, bahaya nang kaya
apa haja kada diasi lagi, bujur nyawa taruhannya tatap dituntinya. Jadi biar
tahabar hudah banyak nang mati di tangan Busu Talimbah, tatap haja urang mahaga
inya. Kaya itu pang sipat manusia nang kada baik.
***
Bersambung ke Bagian 07
Tidak ada komentar:
Posting Komentar